Sælir ágætu íbúar

Fyrir rúmri viku gerðum við þau plön að halda skólastarfi áfram miðað við skipulag sem í gangi var þá og var kynnt. Það fyrirkomulag hefur gengið  vel og börnin verið til fyrirmyndar innan þess skipulags.

Jöfnum höndum höfum við verið að undirbúa okkur fyrir að kenna börnunum í fjarkennslu út frá skólanum til að lágmarka þann skaða sem samfélag okkar yrði fyrir kæmi upp veirusmit.

Við erum lítið samfélag og ef smit kæmi upp í skólanum myndi það hafa mikil áhrif á meiri hluta heimila skólahverfisins. Slíkt gæti haft ófyrirséðar afleiðingar.

Við metum það svo að betra sé að bregðast við frekar fyrr en síðar. Þannig höfum við betri stjórn á aðstæðum og  þannig vonandi forðað samfélaginu frá enn frekari og íþyngjandi aðgerðum. Skólastarfi verður haldið áfram, en með breyttu sniði. Nemendur fá heimakennslu í gegnum stafræna miðla. Þeir fá verkefni sem þeir vinna heima og skila til kennara. Til þess að þetta fyrirkomulag takist sem best, er áframhaldandi gott samstarf við heimilin algjör forsenda. Nú er mikilvægara en nokkru sinni að hjálpast að og huga vel að velferð barnanna og tryggja að við komum sterkari frá þeirri þolraun sem við stöndum frammi fyrir, en áður.

Einnig er það nú svo að þar sem megin stoði okkar samfélags  er matvælaframleiðsla þá þurfum við að huga að því að bændur eru að taka þátt í því að tryggja matvælaöryggi á landinu og mikilvægt að við gerum það sem við getum til að verja það.

Það verður starfsdagur í skólanum á morgun ( 24. mars ) ásamt því að leikskólinn verður opinn en á miðvikudag koma börnin í skólann kl. 13:30 og hitta kennara skólans, ná í gögnin sín og kynningu á því hvernig dagar fram að páskafríi verða.

Eftir það verður börnunum kennt í gegnum netið  þangað til annað verður ákveðið. Þessi ákvörðun er ekki auðveld og við vitum að hún er íþyngjandi. Eitt af því sem við höfum lært undanfarna daga, er að hlutirnir breytast fljótt og verður þessi ákvörðun því sífellt í endurskoðun. Vonandi geta nemendur farið sem fyrst aftur í skólann, bæði leikskólabörn sem grunnskólanemendur okkar. Það er von okkar að þetta verði til góðs fyrir samfélag okkar. Við treystum á gott samstarf allra til þess að tryggja góðar sóttvarnir með því að fara eftir ráðleggingum þeirra sem best vita.

Þessi ákvörðun er tekin af hreppsnefnd og skólastjóra í samvinnu við starfsfólk skólans.

Leggjumst öll á eitt og gerum þetta saman.

23. mars 2020

Eggert Kjartansson oddviti Eyja- og Miklaholtshrepps

Ingveldur Eiríksdóttir skólastjóri Laugargerðisskóla